Upplýsingar á mörgum tungum fyrir foreldra fatlaðra barna

Mynd ráðuneytisins af undirskrift samningsins

Mennta- og barnamálaráðuneytið og Landssamtökin Þroskahjálp hafa gert samning um að setja á fót rafrænt upplýsingatorg fyrir foreldra fatlaðra barna þar sem áhersla verður lögð á að mæta upplýsingaþörfum foreldra með fjölbreyttan tungumála- og menningarbakgrunn. Verkefnið sem ráðuneytið fjármagnar er liður í stefnu stjórnvalda um bætta þjónustu við foreldra langveikra eða alvarlega fatlaðra barna.

Þarna á að miðla alhliða fræðslu fyrir foreldrana um þá þjónustu sem þeim býðst þvert á kerfi og stofnanir ásamt upplýsingum um stuðning við aðstandendur. Á upplýsingatorginu á einnig að leiða saman fjölskyldur í svipuðum sporum. 

Lagðar verða 18 milljónir í verkefnið á þriggja ára tímabili en upplýsingatorgið er tilraun þar sem fylgst verður með notkun þess og árangri af starfinu.